ﺣﻜﺎﻳﺔ " ﺳﺎﻋﺔ ﻣﻦ ﺳﺎﻋﺎﺗﻮ ﺗِﻐﻨﻲ "

ﻳﺤﻜﻴﻮﺍ ﻓﻲ ﻗﺪﻳﻢ ﺍﻟﺰﻣﺎﻥ، ﻋﻠﻰ ﻭﺍﺣﺪ ﺧﺒّﺎﺯ، ﺍﻟﺨﺒّﺎﺯ ﺷﻨﻮﺍ ﺭﺍﺱﻣﺎﻟﻮ ﻓﻲ ﻫﺎﻙ ﺍﻟﺰﻣﺎﻥ ؟ ﻛﺎﺭﻱ ﺍﻟﻜﻮﺷﺔ، ﻭﻋﻨﺪﻭ ﻣﺨﺒﺰﻳﻦ ﻭ ﺍﻻﺛﻼﺛﺔ، ﻭﺳﺎﻋﺔ ﺳﺎﻋﺔ ﺣﻤﻞ ﺣﻄﺐ، ﻭﻳﻄﻴّﺐ ﻟﻠﻨﺎﺱ ﻓﻲ ﺧﺒﺰﻫﻢﺑﺎﻟﻜﺮﺍﺀ .ﻫﺎﻙ ﺍﻟﺨﺒّﺎﺯ ﻛﺎﻥ ﻓﻘﻴﺮ ﺣﺎﻝ، ﻳﻬﺰ ﺳﺎﻕ ﺗﻐﺮﻕ ﺳﺎﻕ، ﻻ ﺩﺍﺭ، ﻻﻣﺮﺃﺓ، ﻻ ﺻﻐﺎﺭ، ﺍﻟﻨﻬﺎﺭ ﺑﻄﻮﻟﻮ ﻳﺨﺪﻡ ﻓﻲ ﺍﻟﻜﻮﺷﺔ ﻭ ﻓﻲ ﺍﻟﻠﻴﻞﻳﺒﺎﺕ ﻳﺮﻗﺪ ﻓﻲ ﺍﻟﻜﻮﺷﺔ. ﻭ ﻫﺎﻙ ﺍﻟﺨﺒّﺎﺯ ﻋﻨﺪﻭ ﻃﻔﻞ ﺻﺎﻧﻊ ﻳﺨﺪﻡﻣﻌﺎﻩ ﻭ ﻛﻴﻔﻮ ﺯﺍﺩﻩ ﻫﻮ ﻣﺎ ﻋﻨﺪﻭ ﺣﺪ ﻓﻲ ﻫﺎﻟﺪﻧﻴﺎ، ﻭ ﺍﻟﺨﺒّﺎﺯ ﻭﺍﻟﺼﺎﻧﻊ ﺣﺎﻃﻴﻦ ﺍﻟﺮﻭﺱ ﻋﻠﻰ ﺑﻌﻀﻬﻢ .ﻛﻞ ﻧﻬﺎﺭ ﻛﻴﻒ ﻳﺠﻴﻮﺍ ﻳﺮﻣﻴﻮﺍ ﺍﻟﺨﺒﺰ، ﺍﻟﺼﺎﻧﻊ ﻳﺴﺘﻌﻮﺫ ﻣﻦ ﺍﻟﺸﻴﻄﺎﻥ،ﻋﻠﻰ ﺧﺎﻃﺮ ﺍﻟﺒﻼﻃﻪ ﺍﻟﻠﻲ ﻳﺴﺪﻭ ﺑﻴﻬﺎ ﺑﻴﺖ ﺍﻟﻨﺎﺭ ﺛﻘﻴﻠﺔ ﻋﻠﻴﻪ ﻭﻳﻘﻮﻝ : ﻳﺎ ﻋﺮﻓﻲ ﺃﺵ ﺧﺺ ﻟﻮ ﻛﺎﻥ ﻫﺬﻱ ﻭﺯﻧﻬﺎ ﺫﻫﺐ ؟ﻋﺮﻓﻮ ﻳﻌﻄﻴﻪ ﺑﺴﻄﺎﻛﺔ ﻋﻠﻰ ﺭﺍﺳﻮ ﻭ ﻳﻘﻮﻟﻮ : ﻣﺎ ﻃﻠﺒﺘﺶ ﺣﻔﻨﺔﺫﻫﺐ ﻭ ﺇﻻ ﺣﻔﻨﺘﻴﻦ ؟ ﺗﺤﺐ ﻭﺯﻥ ﺍﻟﺒﻼﻃﺔ ﺫﻫﺐ ؟ !ﻳﻘﻮﻟﻠﻮ: ﻳﺎ ﻋﺮﻓﻲ ﻳﻠﻲ ﻳﻄﻠﺐ ﺭﺑﻲ ﻳﻄﻠﺐ ﺑﺎﻟﻜﻤﺎﻝ. ﺭﺣﻤﺘﻮ ﻭﺍﺳﻌﺔ،ﻭﻣﺨﺎﺯﻧﻮ ﻣﻼﻳﺎ، ﻭ ﺳﺎﻋﺔ ﻣﻦ ﺳﺎﻋﺎﺗﻮ ﺗِﻐﻨﻲ، ﺃﺷﻜﻮﻥ ﻗﺎﻝ ﻟﻚ ﻳﻠﻲﻧﺤﻨﺎ ﺑﺎﺵ ﻧﻘﻌﺪﻭﺍ ﺩﻳﻤﺔ ﻓﻲ ﻫﺎ ﺍﻟﻬﺎﻧﺔ ﺍﻟﻔﻘﺮ ﻭ ﺍﻟﻤﻴﺰﻳﺮﻳﺎ ؟ ﺑﺎﻟﻚﻳﺠﻲ ﻧﻬﺎﺭ ﻭ ﺗﺘﻔﺮﻫﺪ ﺍﻻﺣﻮﺍﻝ. ﻛﻞ ﻧﻬﺎﺭ ﻓﻴﻦ ﻳﻌﺎﻭﺩ ﻫﺎﻟﻜﻼﻡ ﻳﺎﻛﻞﺍﺻﻄﺎﻛﺔ ﻣﻦ ﻋﻨﺪ ﻋﺮﻓﻮ

ﻳﺎ ﺳﻴﺪﻱ ﻫﺎﻙ ﺍﻟﺨﺒّﺎﺯ ﻣﺎ ﺗﻌﺪﺍﺗﺶ ﺍﻣﻮﺭﻭ ﻣﻠﻴﺢ ﻗﺪّﺭ ﻋﻠﻴﻪ ﺭﺑﻲﻓﻠﺲ، ﺳﻠّﻢ ﻓﻲ ﺍﻟﻜﻮﺷﺔ ﻭﺑﺎﻉ ﺍﻟﻤﺨﻴﺒﺰﺍﺕ، ﻭﻃﺮﻑ ﺍﻟﺤﺼﻴﺮﺓ ﺍﻟﻠﻲﻋﻨﺪﻭ، ﻭﺍﻟﺤﻄﺐ ﻳﻠﻲ ﺗﺒﻘﺎﻟﻮ ﻭ ﻗﺎﻝ: ﺇﺫﺍ ﻣﺎ ﻭﺍﺗﺎﺗﻜﺶ ﺑﻼﺩ ﺑﺪّﻝﺑﺄﺧﺘﻬﺎ ﻭﻟﻮ ﻛﺎﻥ ﺣﺠﺮﻫﺎ ﺯﻣﺮﺩ ﻭﻳﺎﻗﻮﺕ . ﻫﺎﻙ ﺍﻟﺼﺎﻧﻊ، ﻳﺎ ﻋﺮﻓﻲﻛﻴﻔﺎﺵ ﺗﻤﺸﻲ ﻋﻠﻲ؟ ﻟﺸﻜﻮﻥ ﺗﺨﻠﻴﻨﻲ؟ ﻗﺎﻝ ﻟﻮ: ﻭﻟﻴﺪﻱ ﻓﻴﻬﺎ ﻣﺪﺑّﺮﺣﻜﻴﻢ، ﻭﻳﻠﻲ ﻳﺨﻠﻖ ﻣﺎ ﻳﻀﻴّﻊ، ﻭﻋﻠﻰ ﻛﻞ ﺣﺎﻝ ﻣﺎﻙ ﺩﻳﻤﺎ ﺗﻘﻮﻝ :ﺳﺎﻋﺔ ﻣﻦ ﺳﺎﻋﺎﺗﻮ ﺗِﻐﻨﻲ، ﻟﻌﻞ ﻳﺠﻴﺒﻚ ﺭﺑﻲ ﻓﻲ ﺳﺎﻋﺔ ﺳﻌﻴﺪﺓ.ﺧﻼﻟﻮ ﻛﻴﻒ ﻣﺎ ﻧﻘﻮﻟﻮ ﺯﻭﺯ ﻓﺮﻧﻚ ﺑﺎﺵ ﻳﺪﺑﺮ ﺭﺍﺳﻮ ﺣﺘﻰ ﻳﻨﻮﺏ ﻋﻠﻴﻪﺭﺑﻲ ﺑﺨﺪﻣﺔ، ﻭﺷﺪ ﺍﻟﺜﻨﻴ

ﻗﻌﺪ ﻫﺎﻙ ﺍﻟﻮﻟﺪ ﻭﺣﺪﻭﻳﺪﻭﺭ ﻣﻦ ﺳﻮﻕ ﻟﺴﻮﻕ، ﻭ ﻳﻔﺼّﻞ ﻓﻲﺍﻟﻨﻬﻮﺟﺎﺕ ﻭﻳﺨﻴّﻂ ﻓﻲ ﺍﻟﺰﻧﺎﻗﻲ . ﻭﻓﺎﺗﻠﻮ ﻫﺎﻙ ﺯﻭﺯ ﻓﺮﻧﻚ، ﻭﻗﻒ ﻓﻲﺑﺎﺏ ﺍﻟﺒﻼﺩ ﻳﺴﺘﻨﻰ ﺛﻤﺎﺷﻲ ﻣﺎ ﻳﺠﻲ ﺣﺪ ﻳﺨﺪﻣﻮ. ﺍﻟﻨﻬﺎﺭ ﺍﻻﻭﻝ،ﺍﻟﺜﺎﻧﻲ، ﺍﻟﺜﺎﻟﺚ، ﻧﻬﺎﺭ ﻫﻮ ﻭﺍﻗﻒ ﻭﻫﺎ ﺍﻟﺮﺍﺟﻞ ﻭﻗﻒ ﻋﻠﻴﻪ ﻗﺎﻝ :ﺗﺨﺪﻡ ﻳﺎ ﻭﻟﺪﻱ ؟ﻗﺎﻟﻮ : ﺑﻴﻦ ﻳﺪﻳﻚ ﻳﺎ ﺑﺎﺑﺎ . ﻗﺎﻟﻮ : ﺗﺒﻌﻨﻲ . ﺑﺪﺍ ﺍﻟﺮﺍﺟﻞ ﻣﺎﺷﻲ ﻭ ﻫﻮﻓﻲ ﺟﺮﺗﻮ، ﺷﻘﻮﺍ ﺑﺎﺏ ﺳﻮﻳﻘﺔ، ﺍﻟﻤﺪﻳﻨﺔ، ﻭﺻﻠﻮ ﻛﻴﻒ ﻣﺎ ﻧﻘﻮﻟﻮﻟﺒﻄﺤﺔ ﺭﻣﻀﺎﻥ ﺑﻲ، ﺩﺧﻠﻮﺍ ﻟﺰﻧﻘﺔ .ﻭﻗﻒ ﺍﻟﺮﺍﺟﻞ ﻗﺪﺍﻡ ﺩﺍﺭ ( ﺑﺎﺏ ﻛﺒﻴﺮ ﺑﺎﻟﻘﻤﺠﺔ، ﻇﺎﻫﺮﺓ ﺩﺍﺭ ﺃﻛﺎﺑﺮ)ﺟﺒﺪ ﺍﻟﻤﻔﺘﺎﺡ ﺣﻞ، ﻗﺎﻟﻮ ﺃﺩﺧﻞ ﻳﺎ ﻭﻟﺪﻱ، ﺩﺍﺭ ﻣﺘﺎﻉ ﺃﻛﺎﺑﺮ ﺟﻠﻴﺰ ﻭﻣﺮﻣﺮ ﻭ ﺭﺧﺎﻡ ﻭ ﺃﺑﻨﺎﻙ ﻭﺯﺭﺍﺑﻲ ﻣﺪﻗﻮﻗﺔ ﻓﻲ ﺍﻟﺤﻴﻮﻁ، ﺑﻴﻮﺕ ﺗﻘﻮﻝﺳﺮﺍﻳﺎ ﻣﺘﺎﻉ ﻗﺼﺮ. ﻫﻴﺎ ﻭﺻﻠﻮﺍ ﻟﻮﺳﻂ ﺍﻟﺪﺍﺭ : ﺧﺼّﺔ ﺗﻔﻴﻊ ﺑﺎﻟﻤﺎﺀ، ﻭﺑﻴﻮﺕ ﻣﺘﻨﺎﻇﺮﻳﻦ ﻭﺳﻂ ﺩﺍﺭ ﻃﺎﻭﻟﺔ ﻣﻨﺼﻮﺑﺔ. ﻗﺎﻝ ﺍﻟﺮﺍﺟﻞ: ﺍﻳﺠﻰ ﻳﺎﻭﻟﺪﻱ ﺍﻓﻄﺮ ﺍﻟﺴﺎﻋﺔ ﺣﻂ ﻟﻮ ﺍﻟﻔﻄﻮﺭ، ﻓﻄﺮ، ﺷﺒﻊ، ﺗﺤﻤﺪ ﻭﺗﺸﻜﺮ،ﻗﺎﻝ ﻟﻮ : ﺍﻳﺎ ﺗﻮﻩ ﻳﺎ ﻭﻟﺪﻱ : ﺧﺮﺟﻮ ﻟﻮﺳﻂ ﺍﻟﺪﺍﺭ، ﺛﻤﺔ ﺑﻼﻃﺔ،ﻗﺎﻟﻠﻮ: ﻫﺰﻫﺎ . ﻫﺰﻫﺎ ﺗﺤﺘﻬﺎ ﻣﻄﻤﻮﺭ، ﺑﻼﻃﺔ ﺍﺧﺮﻯ ﻟﻐﺎﺩﻱ ﻣﻨﻬﺎ ﻗﺎﻝﻟﻮ: ﻫﺰ ﻫﺬﻳﻜﺎ ﺯﺍﺩﺓ، ﻫﺰﻫﺎ : ﺍﻟﻤﻄﻤﻮﺭ ﺍﻷﻭﻻﻧﻲ ﻣﻠﻴﺎﻥ، ﻭ ﺍﻟﺜﺎﻧﻲﻓﺎﺭﻍ. ﺍﻟﻤﻠﻴﺎﻥ، ﻣﻠﻴﺎﻥ ﺑﺎﻟﺬﻫﺐ ﻭ ﺍﻟﻠﻮﻳﺰ ﻟﻠﻔﻢ ﻛﻴﻤﺎ ﻳﻌﻄﻴﻨﺎ ﻭ ﻳﻌﻄﻴﻜﻢﻣﻦ ﺭﺯﻕ ﺍﻟﺤﻼﻝ ﺍﻟﻄﻴﺐ ! ﻗﺎﻟﻮ ﺣﺘﻰ ﺣﺪ ﻣﺎ ﻳﻌﺮﻑ ﺑﻬﺎﻟﻤﻄﻤﻮﺭ ﻛﺎﻥﺇﻧﺖ ﺭﺩ ﺑﺎﻟﻚ ﺗﻌﺎﻭﺩ ﻟﺤﺪ . ﺟﺎﺑﻠﻮ ﺷﻜﺎﺭﺓ ﻧﺨﺎﻟﺔ ﺻﺒّﻬﺎ ﺑﺤﺬﺍﻩ ﻭﻗﺎﻟﻠﻮ : ﺇﺟﺒﺪ ﻣﻦ ﺛﻤﺔ، ﻭ ﺇﻣﺴﺢ ﺑﺎﻟﻨﺨﺎﻟﺔ، ﻭ ﺃﺭﻣﻲ ﻓﻲ ﻫﺎﻙ ﺍﻟﻔﺎﺭﻍﺣﺘﻰ ﻳﺘﻌﺒﻰ، ﻭﻓﻄﻮﺭﻙ ﻭﻋﺸﺎﻙ ﻭﻓﺮﺷﻚ ﻫﻮﻧﻲ، ﻭﻧﻬﺎﺭ ﻳﻠﻲ ﺗﻜﻤﻞﻧﻌﻄﻴﻚ ﻳﻠﻲ ﻳﺮﺿﻴﻚ .ﺗﻮﻛﻞ ﺑﺎﻟﻠﻪ ﺍﻟﻮﻟﺪ ﻳﺨﺪﻡ ﺍﻟﻨﻬﺎﺭ ﺍﻟﻜﻞ ﻭ ﻫﻮ ﻗﺎﻋﺪ ﻓﻲ ﺍﻟﻘﺎﻋﺔ ﻭﺣﺎﻟﻞﺳﺎﻗﻴﻪ، ﻳﻄﻠﻊ ﺑﺎﻟﻘﻔﺔ ﻭ ﻳﺼﺐ ﻗﺪﺍﻣﻮ ( ﻟﻮﻳﺰ ﺃﺧﻀﺮ ﻣﺨﺰﺯ ) ﻳﻤﺴﺢ ﻭﻳﺤﻚ ﺍﻟﻜﻌﺒﺔ ﻳﻠﻲ ﺗﻨﻈﺎﻑ ﻭﺗﻮﻟﻲ ﺗﺒﺮﻕ ﺑﺮﻳﻖ، ﻳﺸﻴّﻌﻬﺎ ﻓﻲ ﺍﻟﻤﻄﻤﻮﺭﺍﻻﺧﺮ ﻭ ﺍﻟﺪﺍﺭ ﻣﺴﻜﺮﺓ ﻭ ﺍﻟﺮﺍﺟﻞ ﺳﺎﻋﺔ ﺳﺎﻋﺔ ﺇﻳﺠﻲ ﻳﻄﻞ ﻋﻠﻴﻪ،ﻭﺍﻟﻔﻄﻮﺭ ﻭﺍﻟﻌﺸﺎﺀ ﺛﻤﻴﻜﺔ، ﺣﺘﻰ ﻭﻓﺎﺕ ﺍﻟﺨﺪﻣﺔ، ﺣﺎﺳﺒﻮ ﻭ ﺯﺍﺩﺃﺣﺴﻦ ﻟﻮ، ﻭﻣﺸﻰ ﻋﻠﻰ ﻧﻔﺴﻮ

ﺪﻯ ﻳﻘﺴﻂ ﻓﻲ ﻫﺎﻙ ﺍﻟﻔﻠﻴﺴﺎﺕ ﻭ ﻳﺪﺑّﺮ ﻓﻲ ﺭﺍﺳﻮ، ﻣﺮﺓ ﻳﺤﻤﻞﺣﻤﻴﻠﺔ، ﻭﻣﺮﺓ ﻳﺠﻴﺒﻮ ﺗﺎﺟﺮ ﻳﻜﻨﺴﻠﻮ ﺍﻟﺤﺎﻧﻮﺕ، ﻭﻣﺮﺓ ﻭﺍﺣﺪ ﻳﻘﻀﻴﻪﻗﻀﻴﺔ، ﺑﺮﻩ ﻳﺎ ﺯﻣﺎﻥ، ﻭﺍﻳﺠﺎ ﻳﺎ ﺯﻣﺎﻥ، ﻧﻬﺎﺭ ﺳﻤﻊ ﻓﻲ ﺍﻟﺪﻻﻝ ﻳﺪﻟﻞﻋﻠﻰ ﺩﺍﺭ، ﻗﺎﻝ ﺩﺍﺭ ﻓﻲ ﺍﻟﺤﻮﻣﺔ ﺍﻟﻔﻼﻧﻴﺔ. ﺟﺎﺀ ﻳﻨﺸﺪ ﻗﺎﻟﻮﺍ ﻟﻮ :ﻫﺬﻱ ﺩﺍﺭ ﺳﻲ ﻓﻼﻥ ﻣﺎﺕ ﻭﻣﺎ ﺧﻠﻰ ﺣﺪ , ﺳﻲ ﻓﻼﻥ ﻳﻠّﻲ ﺧﺪﻡ ﻋﻨﺪﻭ( ﻣﺘﺎﻉ ﺍﻟﻤﻄﻤﻮﺭ ﺍﻟﻤﻌﺒﻲ ﺑﺎﻟﺬﻫﺐ ) : ﺑﺎﺵ ﺗﺘﺒﺎﻉ ﻟﺒﻴﺖ ﺍﻟﻤﺎﻝ .ﻣﺎﺷﻴﻦ ﺍﻟﻨﺎﺱ ﻣﻊ ﺍﻟﺪﻻﻝ ﺑﺎﺵ ﻳﻘﻠﺒﻮﺍ ﻭﻳﺘﻔﺮﺟﻮﺍ ﻣﻦ ﺑﻴﺖ ﻟﺒﻴﺖ،ﺗﺨﻠّﻒ ﻫﻮ ﻓﻲ ﺑﻴﺖ، ﺧﺮﺟﻮﺍ ﺍﻟﻨﺎﺱ ﻗﻌﺪ ﺛﻤﻪ، . ﺑﺎﺏ ﺍﻟﺪﺍﺭ ﺗﺴﻜﺮ،ﻭﻫﻮ ﺧﺮﺝ ﻳﺠﺮﻱ ﻟﻬﺎﻙ ﺍﻟﻤﻄﻤﻮﺭ، ﻫﺰ ﺍﻟﺒﻼﻃﻪ ﻳﻠﻘﺎﻩ ﺑﺄﻣﺎﻧﺘﻮ. ﺑﺎﻟﻠﻮﻳﺰﻟﻠﻔﻢ ﻳﺨﻄﻒ ﺍﻻﻧﻈﺎﺭ.

ﻫﺰ ﺍﻟﺒﻼﻃﻪ ﻳﻠﻘﺎﻩ ﺑﺄﻣﺎﻧﺘﻮ ﺑﺎﻟﻠﻮﻳﺰ ﻟﻠﻔﻢ ﻳﺨﻄﻒ ﺍﻷﻧﻈﺎﺭ، ﻋﺒﻰﻣﻜﺎﺗﺒﻮ. ﺍﻟﺒﺎﺏ ﻣﺴﻜﺮ ﻣﺎ ﻳﻨﺠﻤﺶ ﻳﺨﺮﺝ، ﻗﻌﺪ ﺑﺎﺕ، ﻣﻦ ﻏﺪﻭﻳﻜﺎﺭﺟﻊ ﺍﻟﺪﻻﻝ ﺟﺎﻳﺐ ﻧﺎﺱ ﺍﺧﺮﻳﻨﺎ ﻳﻘﻠﺒﻮﺍ ﻓﻲ ﺍﻟﺪﺍﺭ، ﺩﺧﻞ ﻫﻮ ﻓﻲﻭﺳﻂ ﺍﻟﻨﺎﺱ. ﻗﺎﻝ ﺍﻟﺪﻻﻝ ﺑﺎﺏ ﺭﺑﻲ، ﺑﺪﺍﻭﺍ ﺍﻟﻨﺎﺱ ﻳﺘﺰﺍﻳﺪﻭﺍ، ﺗﻘﺪﻡﻫﺎﻭ ﻳﺰﻳﺪ ﻣﻌﺎﻫﻢ ﻃﺎﺡ ﻋﻠﻴﻪ ﺍﻟﺴﻮﻡ . ﺟﺒﺪ ﺍﻟﻔﻠﻮﺱ ﻭﺩﻓﻊ ﻭ ﺧﺬﺍﺍﻟﻤﻔﺎﺗﺢ، ﻭﺧﺮﺝ ﻣﻊ ﺍﻟﺪﻻﻝ، ﻗﻴّﺪ ﺍﻟﺪﻻّﻝ ﻋﻨﺪ ﺍﻟﻌﺪﻭﻝ : ﺻﺒﺤﺖﺍﻟﺪﺍﺭ ﻣﻠﻜﻮ ﻭ ﺭﺯﻗﻮ ﻭ ﺣﻼﻟﻮ. ﻣﺸﻰ ﻟﻠﺴﻮﻕ، ﺷﺮﻯ ﺳﺒﻌﻪ ﻭ ﺍﻻﺛﻤﺎﻧﻴﺔ ﺧﺰﻧﺎﺕ ﻣﻦ ﻫﺎﻙ ﺍﻟﺤﺪﻳﺪ ﻳﻠﻲ ﻣﺎ ﻳﺘﺤﻠﻮﺍ ﺍﻻ ﺑﺎﻟﺴﻜﺮﻳﺘﻮ،ﻭﻣﺴﺎﻣﺮﻫﻢ ﻗﺪ ﻋﻈﻤﺔ ﺍﻟﺪﺟﺎﺟﺔ ﻋﺒﺎﻫﻢ ﺑﻬﺎﻙ ﺍﻟﻠﻮﻳﺰ ﻭ ﺍﻟﺬﻫﺐ ﻭﺳﻜﺮ، ﺣﻞ ﺩﺍﺭﻭ ﻭﺟﺎﺏ ﺍﻟﺨﺪﺍﻡ . ﺷﺮﻯ ﺣﺎﻧﻮﺕ ﻓﻲ ﺳﻮﻕ ﺍﻟﺮﺑﻊﻭﻋﻤﺮﻭ ﺑﺎﻟﺴﻠﻌﺔ . ﺍﻟﻨﺎﺱ ﺗﺒﻴﻊ ﺑﻤﺎﺋﺔ، ﻭﻫﻮ ﻳﺒﻴﻊ ﺑﺨﻤﺴﻴﻦ ( ﻣﻦ ﻋﻨﺪﺭﺑﻲ ) ﺗﺸﻬﺮ ﻓﻲ ﻫﺎﻙ ﺍﻟﺒﻼﺩ، ﻭﻟﻰ ﺳﻲ ﻓﻼﻥ ﺍﻟﻔﻼﻧﻲ، ﺧﻄﺐﻃﻔﻠﺔ ﻣﻦ ﺃﻛﺒﺮ ﻛﺒﻴﺮﻫﺎ ﻭ ﺗﺰﻭﺝ ﻭﻻﺕ ﺩﺍﺭﻭ ﻣﻘﺼﻮﺩﺓ، ﻭﻋﺮﻣﺔ ﺗﺠﻴﻬﺎﺍﻟﻜﻴﺎﻟﺔ .ﻧﻬﺎﺭ ﺟﺎﺀ ﻃﺎﻟﺐ ﻋﻠﻰ ﺑﺎﺏ ﺍﻟﺪﺍﺭ: ﻳﺎ ﻛﺮﻳﻢ ﻣﺘﺎﻉ ﺍﻟﻠﻪ . ﻗﺎﻋﺪ ﻓﻲﺍﻟﺮﻭﺷﻦ ﻫﻮ ﻭ ﺍﻟﻌﺮﻭﺳﺔ ﻳﺴﻤﻊ ﻓﻲ ﺍﻟﺼﻮﺕ، ﻋﻘﻠﻮ ! ﻋﻘﻞ ﺻﻮﺕﻋﺮﻓﻮ. ﺍﻩ ﻗﺎﻝ: ﻋﺮﻓﻲ ﺣﻂ ﺑﻴﻪ ﺍﻟﺰﻣﺎﻥ ﺣﺘﻰ ﻭﻟﻰ ﻳﻄﻠﺐ؟ ﺯﻋﻤﺔﻫﻮ؟ ﺧﺮﺝ ﻳﺸﻮﻑ ﻓﻴﻪ : ﻳﻠﻘﺎﻩ ﻫﻮ .ﻟﻜﻦ ﻋﺮﻓﻮ ﻣﺎ ﻋﺮﻓﻮﺵ، ﻗﺎﻟﻮ ﺍﺗﻔﻀﻞ ﻳﺎ ﺑﺎﺑﺎ ﺍﺩﺧﻞ. ﺣﻄﻮﻟﻮﺍﻟﻔﻄﻮﺭ، ﻓﻄﺮ، ﺷﺒﻊ، ﺟﺎ ﻗﺎﻳﻢ ﺑﺎﺵ ﻳﻤﺸﻲ ﻋﻠﻰ ﻧﻔﺴﻮ ﻗﺎﻟﻠﻮ:ﺍﻗﻌﺪ ﺿﻴﻒ ﺭﺑﻲ .ﻳﺠﺒﺪﻫﺎ ﺛﻤﻴﻜﺔ ﺛﻼﺛﻪ ﺃﻳﺎﻡ: ﺍﻟﻤﺎﻛﻠﺔ ﻣﻨﻮ، ﻭﺍﻟﺮﻗﺎﺩ ﻋﻠﻴﻪ. ﻭ ﻣﻮﻟﻰﺍﻟﺪﺍﺭ ﻳﻔﻄﺮ ﻓﻴﻪ ﻭﻳﻌﺸﻲ ﻓﻴﻪ ﻣﻌﺎﻩ. ﻧﻬﺎﺭ ﺛﺎﻟﺚ ﻳﻮﻡ ﺑﺪﺍ ﻳﺤﻜﻲ ﻋﻠﻰﺍﻟﺨﺒّﺎﺯ، ﻭﻋﻠﻰ ﺻﺎﻧﻌﻮ، ﻭﻋﻠﻰ ﺍﻟﺒﻼﻃﺔ ﺍﻟﻠﻲ ﻭﺯﻧﻬﺎ ﺫﻫﺐ ﻭ ﻭﻋﻠﻰﺍﻟﺨﺒّﺎﺯ ﻛﻴﻔﺎﺵ ﻳﺼﻄﻚ ﻟﻠﺼﺎﻧﻊ .ﻗﺎﻟﻠﻮ: ﻳﺎ ﺳﻴﺪﻱ ﺇﻧﺖ ﻣﻨﻴﻦ ﺗﻌﺮﻑ ﻫﺎ ﺍﻟﻜﻮﺷﺔ ؟ ﻳﺎﺧﻲ ﻛﻨﺖ ﺗﺮﻣﻲﻋﻨﺪﻫﻢ ﻓﻲ ﺍﻟﺨﺒﺰ؟ ﻗﺎﻝ ﻟﻮ: ﻻ .ﻗﺎﻟﻠﻮ ﻋﻠﻰ ﺧﺎﻃﺮ ﺍﻟﺨﺒّﺎﺯ ﺍﻟﻠﻲ ﺗﺤﻜﻲ ﻋﻠﻴﻪ ﻫﻮ ﺃﻧﺎ. ﺣﻂ ﺑﻲ ﺍﻟﺰﻣﺎﻥ،ﻭﻫﺎﻧﻲ ﻭﻟﻴﺖ ﻧﻄﻠﺐ. ﻭﺑﺪﺍ ﻳﺒﻜﻲ. ﻗﺎﻝ ﻟﻮ: ﻭ ﺍﻟﺼﺎﻧﻊ ﻫﻮ ﺃﻧﺎ ! ﻗﺎﻝﻫﺎﻙ ﺍﻟﻌﺮﻑ : ﺍﻧﺖ ؟ﺃﻧﺎ ! ﺗﺮﻣﻰ ﻓﻲ ﺭﻗﺒﺘﻮ ﻭﺑﺪﺍ ﻳﺒﻮﺱ ﻭﻳﺒﻜﻲ . ﻗﺎﻝ ﻟﻮ : ﺷﻔﺘﻨﻲ ﻳﺎﻋﺮﻓﻲ ﻛﻴﻒ ﻛﻨﺖ ﺗﻌﻄﻴﻨﻲ ﺑﺎﻟﺼﻄﺎﻛﺔ ﻭﺗﻘﻮﻟﻲ : ﻣﺎ ﺗﻄﻠﺒﺶ ﺷﺊ ﻳﻠﻲﻣﺎ ﺗﻄﻮﻟﻮﺵ، ﻭ ﺃﻧﺎ ﻧﻘﻮﻟﻚ ﻳﻠﻲ ﻳﻄﻠﺐ ﻋﻠﻰ ﺭﺑﻲ ﻳﻄﻠﺐ ﺑﺎﻟﻜﻤﺎﻝ،ﻭﺳﺎﻋﻪ ﻣﻦ ﺳﺎﻋﺎﺗﻮ ﺗﻐﻨﻲ، ﺍﻳﺎ ﺍﻗﻌﺪ ﻋﻨﺪﻱ ﻭ ﺍﻟﺪﺍﺭ ﺩﺍﺭﻙ، ﻭ ﺍﻧﺖﺑﺎﺑﺎ ﻣﻦ ﺍﻟﺒﺎﺭﺡ ﻣﻮﺵ ﻣﻦ ﺍﻟﻴﻮﻡ . ﻭﻗﻌﺪ ﺑﺤﺬﺍﻩ ﻫﺎﻙ ﺍﻟﺸﺎﻳﺐ،ﻭﻋﺎﺷﻮﺍ ﻣﺘﻬﻨﻴﻦ، ﻭﻓﻲ ﺍﻟﻐﺎﻳﻪ ﻭﺍﻟﻨﻬﺎﻳﺔ ﻭ ﺳﺎﻋﺔ ﻣﻦ ﺳﺎﻋﺎﺗﻮﺗِﻐﻨﻲ ..ﻭﻓﺎﺕ ﺍﻟﺤﻜﺎﻳﺔ ﺇﻧﺸﺎﻟﻠﻪ ﺗﻜﻮﻥ ﻋﺠﺒﺘﻜﻢ