ﺣﻜﺎﻳﺔ " ﺍﻟﺮﺍﺟﻞ ﻳﻠّﻲﻳﺒﻴﺾ ﻓﻲ ﺍﻟﻌﻈﻢ "

ﻓﻤّﺎ ﺳﻠﻄﺎﻥ ﻧﻬﺎﺭ ﺩﺧﻞ ﻋﻠﻴﻪ ﺍﻟﻮﺯﻳﺮ ﻣﺘﺎﻋﻮ ﻳﻀﺮﺏ ﻓﻲ ﻳﺪ ﻋﻠﻰ ﻳﺪ ﻭﻳﺪﻭّﺭ ﻓﻲ ﺭﺃﺳﻪ، ﻗﺎﻟﻮ ﺷﺒﻴﻚ ﻳﺎ ﻭﺯﻳﺮ ؟ﻗﺎﻝ ﺍﻟﻮﺯﻳﺮ : ﻳﺎ ﺳﻴﺪﻱ ﺍﻟﻴﻮﻡ ﺳﻤﻌﺖ ﻏﺮﻳﺒﺔ ﻓﻲ ﺍﻟﺒﻼﺩ ، ﻗﺎﻟﻮﺍﻟﺴﻠﻄﺎﻥ : ﺷﻨﻴﺎ ؟ﻗﺎﻝ ﺍﻟﻮﺯﻳﺮ : ﺳﻤﻌﺖ ﺑﻮﺍﺣﺪ ﻳﺒﻴﺾ ﻓﻲ ﺍﻟﻌﻈﻢ ! ، ﺿﺤﻚ ﺍﻟﺴﻠﻄﺎﻥﻭ ﻗﺎﻝ ﺷﻨﻴﺎ ﻳﺒﻴﺾ ﻓﻲ ﺍﻟﻌﻈﻢ ! ﻋﻼﻩ ﻫﻮ ﺩﺟﺎﺟﺔ ! ؟؟ ﻭ ﺗﻠﻔﺖﻟﻠﺪﺍﻳﺮﺓ ﺍﻟﻜﺘّﺎﺏ ﻭ ﺍﻟﻮﺯﺭﺍﺀ ﻭ ﺍﻟﺤﺮّﺍﺱ ﻭ ﻗﺎﻟﻬﻢ ﺗﺴﻤﻌﻮ ﻓﻴﻪ ﻳﺎﺟﻤﺎﻋﺔ ﻗﺎﻟﻜﻢ ﻭﺍﺣﺪ ﻳﺒﻴﺾ ﻓﻲ ﺍﻟﻌﻈﻢ ﻫﻬﻬﻪﻗﺎﻟﻮﻟﻮ : ﻳﺎ ﺳﻴﺪﻱ ﺣﺘﻰ ﺃﺣﻨﺎ ﻓﻲ ﻋﻠﻤﻨﺎ ﺑﺎﻟﺤﻜﺎﻳﺔ ..ﻗﺎﻝ ﺍﻟﺴﻠﻄﺎﻥ : ﺷﻨﻮﺍ ﺣﺘﻰ ﺇﻧﺘﻮﻣﺎ ! ﻗﺎﻟﻮﻟﻮ ﺇﻱ ﻳﺎ ﺳﻴﺪﻱ ﻭ ﺯﺍﺩﺓﻛﻞ ﻧﻬﺎﺭ ﻣﻮﺵ ﻋﻈﻤﺔ ﻓﻘﻂ ! ﻗﺎﻟﻚ ﻳﺒﻴﺾ 4 ﺣﻴﺎﺭ ﻋﻈﻢ '' ﺟﻤﻊﺣﺎﺭﺓ " ..ﻗﺎﻝ ﺍﻟﺴﻠﻄﺎﻥ : ﻋﺠﺎﻳﺐ ! ﻭﻳﻨﻮ ﻫﺬﺍ ؟ ﺃﺑﻌﺜﻮ ﺟﻴﺒﻮﻩ ﺍﻷﻥ !ﻫﻴّﺎ ﻳﺎ ﺳﻴﺪﻱ ﻣﺸﺎﺕ ﺍﻟﻄّﺎﻣﺔ ﻭ ﺍﻟﻌّﺎﻣﺔ ﻭ ﺟﺎﺑﺎﺗﻮ، ﺩﺧﻞ ﻗﺪّﻡ ﻭﺧّﺮﻋﻄﻰ ﻛﺎﺭ ﺍﻟﺴﻠﻄﻨﺔ .. ﻗﺎﻝ ﺍﻟﺴﻠﻄﺎﻥ : ﺇﻧﺖِ ﻳﻠّﻲ ﺗﺒﻴﺾ ﻓﻲﺍﻟﻌﻈﻢ ؟ ﻗﺎﻝ ﺍﻟﺮﺍﺟﻞ : ﺇﻱ ﻧﻌﻢ ﺃﻧﺎ ﻫﻮ .. ﻗﺎﻝ ﺍﻟﺴﻠﻄﺎﻥ : ﻛﻴﻔﺎﻩﻫﺎﺫﻱ ﺣﺎﺟﺔ ﻣﺎ ﻳﺘﻘﺒﻠﻬﺎﺵ ﺍﻟﻌﻘﻞ !ﻗﺎﻝ ﺍﻟﺮﺍﺟﻞ : ﻣﺎﻻ ﻳﺎ ﺳﻴﺪﻱ ﻧﺤﻜﻴﻠﻚ ﺷﻨﻴﺎ ﺍﻟﺤﻜﺎﻳﺔ ؟ ﻗﺎﻟﻮ : ﺇﻱﻧﻌﻢ ! ﺟﻴﺒﻮﻟﻮ ﻛﺮﺳﻲ ، ﺃﻗﻌﺪ ﻭ ﺃﺣﻜﻲ ﻫﻴﺎ ﻫﺎﻧﻲ ﻧﺴﻤﻊ ﻓﻴﻚ ؟

ﻗﻌﺪ ﺍﻟﺮﺍﺟﻞ ﻭ ﻗﺎﻝ : ﻳﺎ ﺳﻴﺪﻱ ﺃﻧﺎ ﻓﻼّﺡ، ﻋﻨﺪﻱ ﻗﻄﻌﺔ ﺃﺭﺽﺻﻐﻴﺮﺓ ﺩﻳﻤﺎ ﻧﺨﺪﻡ ﻓﻴﻬﺎ ﻭ ﻧﺰﺭﻉ ﻣﺎ ﻛﺘﺐ ﺭﺑﻲ ﻭ ﻣﻨﻬﺎ ﻧﻌﻴﺶ ﺃﻧﺎ ﻭﻣﺮﺗّﻲ ﻭ ﺃﺻﻐﺎﺭﻱ، ﺗﻮّﺍ ﺟﻤﻌﺔ ﻟﺘﺎﻟﻲ ﻭ ﺃﻧﺎ ﻧﺤﺮﺙ ﻓﻲ ﺍﻷﺭﺽ،ﺍﻟﻤﺤﺮﺍﺙ ﻭﺣّﻠﻲ ﻓﻲ ﺣﺠﺮﺓ، ﺣﺒّﺴﺖ ﻭ ﺑﺪﻳﺖ ﻧﺴﻠﻚ ﻓﻴﻪ، ﺑﻌﺪّﺕﺍﻟﺤﺠﺮﺓ ﻭ ﻗﻠﻌّﺘﻬﺎ ﻭ ﺇﺫﺍ ﺑﻴﻬﺎ ﻟﻘﻴﺖ ﺗﺤﺘﻬﺎ ﺟﺮّﺓ ﺻﻐﻴﺮﺓ، ﻛﻴﻤﺎ ﻳﻠﻲﻳﺤﻄﻮ ﻓﻴﻬﺎ ﺍﻟﻠﺒﻦ ﺃﻭ ﺍﻟﺮﺍﻳﺐ، ﻓﺘﺤﺘﻬﺎ ﻭ ﻗﻠﺒﺘﻬﺎ ﻳﺎ ﺳﻴﺪﻱ ﻫﺒﻂ ﻣﻨﻬﺎﺍﻟﻠﻮﻳﺰ، ﻗﻮﻟﺖ ﺍﻟﻠﻪ ﺍﻟﻠﻪ ﻛﺮﻣﻨﻲ ﺭﺑّﻲ ﻭ ﺭﺯﻗﻨﻲ، ﻫﻴّﺎ ﺣﺴﺒﺖ ﻛﻌﺒﺎﺕﺍﻟﻠﻮﻳﺰ ﻧﻠﻘﺎﻫﻢ 30 ﻛﻌﺒﺔ، ﻗﻮﻟﺖ ﻫﺎﺫﻡ ﻧﻬﺒﻂ ﺑﻴﻬﻢ ﻟﻠﺴﻮﻕ ﻧﺸﺮﻱﺑﻴﻬﻢ ﺑﻘﺮﺍﺕ ﻭ ﺑﻌﺪ ﻗﻮﻟﺖ ﻻ ﺗﻮ ﺍﻟﻤﺮﺃﺓ ﻣﺎﺭﺟﺘﻨﻲ ﺗﺤﺐ ﺗﺸﺮﻱ ﺣﻮﺍﻳﺞﻭ ﻣڨﻴﺎﺱ ﺗﻠﺒﺴﻮ ﻓﻲ ﻳﺪﻳﻬﺎ، ﻗﻮﻟﺖ ﻫﻴﺎ ﻛﻴﻒ ﺭﺯﻗﻨﻲ ﺭﺑّﻲ ﺧﻠﻲﻧﻘﺴﻤﻮﻫﻢ ﺃﻧﺎ ﻭ ﺯﻭﺟﺘﻲ، ﺃﻧﺎ ﻧﺄﺧﺬ 15 ﻛﻌﺒﺔ ﻟﻮﻳﺰ ﻭ ﻫﻲ 15 ..ﻟﻜﻦ ﻳﺎ ﺳﻴﺪﻱ ﻓﺠﺄﺓ ﺟﺎﺕ ﺣﺎﺟﺔ ﻓﻲ ﺭﺍﺳﻲ، ﻫﺰﻳﺖ ﺟﺮﺓ ﺍﻟﻠﻮﻳﺰ ﻭﻋﺎﻭﺩﺕ ﺣﻔﺮﺕ ﻭ ﺧﺒﻴﺘﻬﺎ ﻓﻲ ﺑﻼﺻﺔ ﻣﺎ ﻧﻨﺴﺎﻫﺎﺵ، ﻫﻴﺎ ﻳﺎ ﺳﻴﺪﻱ ﻭﻛﻤﻠّﺖ ﻧﺤﺮﺙ ﻋﻠﻰ ﺭﻭﺣﻲ، ﻭ ﻣﻊ ﺍﻟﻌﺸﻴﺔ ﺭﻭّﺣﺖ ﻟﻠﺪﺍﺭ، ﺟﻴﺖ ﺣﺬﺍﺍﻟﻜﻴﺐ ﻳﻠّﻲ ﻳﺒﺎﺗﻮ ﻓﻴﻪ ﺍﻟﺪﺟﺎﺟﺎﺕ، ﻭ ﻃﻠﻴﺖ ﻓﻲ ﺍﻟﺘﺮﻛﻴﻨﺔ ﻟﻘﻴﺖﻋﻀﻤﺎﺕ، ﻫﺰﻳﺖ ﻛﻌﺒﺔ ﻋﻈﻢ ﻭ ﺣﻄﻴﺘﻬﺎ ﻓﻲ ﺟﻴﺒﻲ، ﻭ ﺩﺧﻠﺖ ﻟﻠﺪﺍﺭ،ﻫﻴﺎ ﻃﺎﺡ ﺍﻟﻠﻴﻞ، ﺗﻌﺸﻴﻨﺎ، ﻭ ﺷﺮﺑﻨﺎ ﻛﻴﺴﺎﻥ ﺗﺎﻱ ﻭ ﺑﻌﺪ ﺷﺪﻳﻨﺎﺍﻟﻔﺮﺵ ..ﻫﻴﺎ ﺧﻠﻴﺖ ﻣﺎ ﻗﺮﻳﺐ ﻣﺮﺗﻲ ﺑﺪﻯ ﺍﻟﻨﻮﻡ ﻳﺠﻴﻬﺎ، ﻭ ﺃﻧﺎ ﺑﺪﻳﺖ ﻧﺼﻴﺢ ﺃﻩﻛﺮﺷﻲ ﺃﻩ ﻛﺮﺷﻲ، ﻗﺎﻣﺖ ﺍﻟﻤﺮﺃﺓ ﺃﺵ ﻓﻤﺎ ؟ ﺷﺒﻴﻚ ؟ ﻗﻮﻟﺘﻠﻬﺎﻛﺮﺷﻲ ﺗﻮﺟﻊ ﻓﻴﺎ، ﻗﺎﻣﺖ ﺗﺠﻴﺒﻠﻲ ﻓﻲ ﺍﻟﻤﺎﺀ ﻭ ﺷﻮﻱ ﺯﻫﺮ ﻭ ﺃﻧﺎﺑﺪﻳﺖ ﻧﺼﻴﺢ ﻭ ﻧﻘﻮﻝ ﻳﺎ ﻣﺤﻤﺪ ﻳﺎ ﻋﻠﻲ .. ﻗﺎﺗﻠﻲ ﺷﺒﻴﻚ ﺗﻘﻮﻝ ﻳﺎﻣﺤﻤﺪ ﻳﺎ ﻋﻠﻲ ﻛﺎﻳﺎﻧﻚ ﻣﺮﺃﺓ ﺗﻄﻠﻖ ﺑﺎﺵ ﺗﻮﻟﺪ ! ﻭ ﺑﺪﻳﺖ ﻧﺼﻴﺢ ﻭﺣﺎﺳﺐ ﺭﻭﺣﻲ ﻧﺘﻌﺼّﺮ ﻭ ﻣﻨﻬﺎ ﺻُﺤﺖ ﺻﻴﺤﺔ ﻭﺍﺣﺪﺓ ﻭ ﻗﻮﻟﺖ ﺍﻳﺂﺍﻩﻳﺤﻲ ﻣﻦ ﺃﺣﻴﺎﻧﻲ ﻭ ﻳﻘﺘﻞ ﻣﻦ ﻗﺘﻠﻨﻲ، ﻭ ﺩﺧﻠﺖ ﺍﻳﺪﻱ ﺑﺴﺮﻗﺔ ﻟﺠﻴﺒﻲﻭ ﺣﻄﻴﺖ ﻛﻌﺒﺔ ﺍﻟﻌﻈﻢ ﺗﺤﺘﻲ ﻭ ﻗﻮﻟﺘﻠﻬﺎ ﺷﻮﻑ ﺷﻮﻑ ﻳﺎ ﻣﺮﺃﺓ ﺷﻨﻮﺍﻳﻠﻲ ﺗﺤﺘﻲ، ﻣﺪّﺕ ﻳﺪﻳﻬﺎ ﺗﻠﻘﻰ ﻋﻈﻤﺔ ! ﻗﺎﻟﺖ ﻭﻭﻭﻭﻩ ﺷﻨﻴﺎ ﻫﺬﻩ ؟ﻗﻮﻟﺘﻠﻬﺎ ﻫﺎﻧﻲ ﻋﻈﻤﺔ، ﺑﻀﺖ ﻋﻈﻤﺔ ﺃﺵ ﻳﺼﻌﺐ ﻋﻠﻰ ﺭﺑّﻲ ؟ !!ﻭ ﻟﻜﻦ ﻗﻮﻟﺘﻠﻬﺎ ﺍﻟﺮﺍﺟﻞ ﺷﻜﻮﻥ ﻳﻜﺘﻤﻠﻮ ﺳﺮّﻭ ﻏﻴﺮ ﻣﺮﺗﻮ ؟ ﺃﺳﻜﺖ ﻣﺎﺗﻘﻮﻝ ﻟﺤﺘﻰ ﺃﺣﺪ ﻳﻠّﻲ ﺃﻧﺎ ﺑﻀﺖ ﻋﻈﻤﺔ ! ﺍﻟﺤﻜﺎﻳﺔ ﺗﻤﻮﺕ ﺑﻴﻨﺎﺗﻨﺎ ﻣﺎﻧﺤﺐ ﺣﺘﻰ ﺃﺣﺪ ﻳﺴﻤﻊ ﺑﻴﻬﺎ، ﻗﺎﺗﻠﻲ ﺯﻭﺟﺘﻲ ﻭﻭﻩ ﻫﺬﺍ ﻛﻼﻡ ﻳﺘﻘﺎﻝ !ﻓﺎﺵ ﻗﺎﻡ ﻧﻌﺎﻭﺩ ! ﻳﺰﻱ ﺑﺮﻛﺎ

ﻟﻜﻦ ﺍﻟﻤﺮﺃﺓ ﺑﺎﺗﺖ ﺗﺘﻘﻠّﻰ، ﻭ ﻣﻊ ﺍﻟﻔﺠﺮ ﻣﺸﺎﺕ ﻟﻠﺠﺎﺭﺗﻬﺎ ﻭ ﺩﻗﺖﻋﻠﻴﻬﺎ ﻭ ﻗﺎﻟﺘﻠﻬﺎ : ﻳﺎ ﺟﺎﺭﺗﻲ ﻣﺎ ﺳﻤﻌﺘﺶ ﺍﻟﺼﻴﺎﺡ ﺍﻟﺒﺎﺭﺡ ؟ﻗﺎﻟﺘﻠﻬﺎ : ﻋﻼﻩ ﺃﺵ ﻓﻤّﺎ ؟ ﻗﺎﻟﺘﻠﻬﺎ ﺃﻃﻠﺐ ﺍﻟﻠﻄﻒ ﺗﻲ ﻣﺎﻫﻮ ﺭﺍﺟﻠﻲﺑﺎﺽ ﻋﻈﻤﺔ ! ﻗﺎﻟﺘﻠﻬﺎ ﻭ ﺍﻟﻜﻌﺒﺔ ﺍﻟﺸﺮﻳﻔﺔ ﺑﺎﺽ ﻋﻈﻤﺔ ﻗﺪﺍﻣﻲ، ﻭﻗﺎﻟﺘﻠﻬﺎ ﻣﺎﻧﻲ ﻭﺧﻴﺘﻚ ﻣﺎ ﺗﻌﺎﻭﺩ ﻟﺤﺘﻰ ﺃﺣﺪ .. ﻭ ﻣﻦ ﺣﻴﻨﻬﺎ ﻣﺸﺎﺕﻟﺠﺎﺭﺗﻬﺎ ﻭ ﻗﺎﻟﺘﻠﻬﺎ ﻧﻔﺲ ﺍﻟﺸﻲﺀ، ﻭ ﻫﺎﻙ ﺍﻟﺠﺎﺭﺓ ﻣﺸﺎﺕ ﻋﺎﻭﺩﺕﻟﻠﺠﺎﺭﺓ ﺍﻷﺧﺮﻯ ﻭ ﻣﺎ ﻃﻠﻌﺖ ﺍﻟﺸﻤﺲ ﺇﻻ ﻣﺎ ﺍﻟﺤﻜﺎﻳﺔ ﺳﻤﻌﻮﺍ ﺑﻴﻬﺎﺍﻟﺤﻮﻣﺔ ﺍﻟﻜﻞ، ﻭ ﺍﻟﺠﺎﺭﺓ ﻗﺎﻡ ﺭﺍﺟﻠﻬﺎ، ﻗﺎﺗﻠﻮ ﺗﻲ ﻓﻼﻥ ﺟﺎﺭﻧﺎ ﺭﺍﻫﻲﺟﺎﺕ ﻣﺮﺗﻮ ﻭ ﻗﺎﻟﺖ ﺭﺍﻫﻮ ﺑﺎﺽ ﻋﻈﻤﺔ ﻭ ﺇﻻ ﻋﻈﻤﺘﻴﻦ .. ﻭ ﺍﻟﺮﺍﺟﻞﻋﻨﺪﻩ ﺣﺎﻧﺘﻮ ﻓﻲ ﺍﻟﺴﻮﻕ ﺧﺮﺝ ﻳﻌﺸﻖ ﻳﻠّﻲ ﻳﻌﺮﺿﻮ ﻳﻘﻮﻟﻮ ﻓﻼﻥ ﺑﺎﺽﺣﺎﺭﺓ ﻋﻈﻢ ﺍﻟﺒﺎﺭﺡ، ﻭ ﺟﺎﺑﻠﻮ ﺍﻟﻘﻬﻮﺍﺟﻲ ﻗﻬﻮﺓ ﻗﺎﻟﻮ ﻫﺎﻙ ﺳﻲ ﻓﻼﻥﺍﻟﺒﺎﺭﺡ ﺑﺎﺽ 6 ﻛﻌﺒﺎﺕ ﻋﻈﻢ ﻗﺎﻟﻮ، ﻭ ﺍﻟﻘﻬﻮﺍﺟﻲ ﺭﺟﻊ ﻟﻠﻘﻬﻮﺓ ﻭﻗﺎﻟﻬﻢ ﻳﺎ ﻧﺎﺱ ﺳﻤﻌﺘﻮﺵ ﺑﺴﻲ ﻓﻼﻥ ﻫﺎﻙ ﺍﻟﻔﻼﺡ ﻫﺎﻭ ﻗﺎﻟﻮ ﺍﻟﺒﺎﺭﺡﺑﺎﺽ ﺣﺎﺭﺗﻴﻦ ﻋﻈﻢ ..ﻳﺎ ﺳﻴﺪﻱ ﺍﻟﺴﻠﻄﺎﻥ ﻭ ﺑﺪﺃ ﺍﻟﺨﺒﺮ ﻳﺴﺮﻱ، ﻳﻠّﻲ ﻗﺎﻟﻮﻟﻮ ﺣﺎﺭﺓ ﻗﺎﻝﺣﺎﺭﺗﻴﻦ، ﻭ ﻳﻠّﻲ ﻗﺎﻟﻮﻟﻮ ﺣﺎﺭﺗﻴﻦ ﻗﺎﻝ 3 ﺣﻴﺎﺭ، ﻭ ﻳﻠّﻲ ﻗﺎﻭﻟﻮ 3 ﺣﻴﺎﺭﻗﺎﻝ 4 ﺣﻴﺎﺭ ..ﻭ ﻗﺎﻟﻮ ﻳﺎ ﺳﻴﺪﻱ ﻫﺎﻙ ﺷﻮﻓﺖ ﺍﻟﻨﺎﺱ ﻗﺪّﺍﻩ ﻳﻌﺮﻓﻮ ﻳﺰﻳﺪﻭ ﻓﻲﺍﻟﻜﻼﻡ، ﻭ ﻋﻤﺮﻭ ﻭﺍﺣﺪ ﻣﺎ ﺗﺤﻜﻴﻠﻮ ﺣﻜﺎﻳﺔ ﻭ ﺇﻳﻌﺎﻭﺩﻫﺎ ﻛﻴﻒ ﻣﺎﻫﻲﻻﺯﻡ ﻳﺰﻳﺪ ﻋﻠﻴﻬﺎ، ﻭ ﻫﺎﻭ ﻋﻠﻰ ﻛﻞ ﺣﺎﻝ ﻋﻈﻤﺔ ﻭﻻّﺕ 4 ﺣﻴﺎﺭ ﻋﻈﻢ،ﻭ ﻧﺤﻤﺪ ﺭﺑّﻲ ﻭ ﻧﺸﻜﺮﻭ ﻳﻠّﻲ ﻣﺎ ﻗﻮﻟﺘﺶ ﻟﺰﻭﺟﺘﻲ ﻳﻠّﻲ ﺃﻧﺎ ﻟﻘﻴﺖ 30ﻛﻌﺒﺔ ﻟﻮﻳﺰ، ﻭ ﺇﻻ ﺭﺍﻫﻲ ﻋﺎﻭﺩﺕ ﺍﻟﺤﻜﺎﻳﺔ ﻭ ﻭﺍﺣﺪ ﻳﻘﻮﻝ 60 ﻛﻌﺒﺔﻭ ﺍﻷﺧﺮ ﻳﻘﻮﻝ 100 ﻭ ﺍﻷﺧﺮ ﻳﻘﻮﻝ 300 ﻛﻌﺒﺔ ﻭ ﺍﻷﺧﺮ ﻳﻘﻮﻝ500 ﻛﻌﺒﺔ .. ﻭ ﻭﺍﺣﺪ ﻳﻘﻮﻝ 1000 ﻛﻌﺒﺔ .. ﻭ ﻫﻜﺎ ﻳﺒﻠﻐﻚ ﺍﻟﺨﺒﺮﻳﺎ ﺳﻴﺪﻱ ﺍﻟﺴﻠﻄﺎﻥ ﻭ ﺗﻘﻮﻝ ﻫﺬﺍ ﺑﺎﺵ ﻳﺰﺍﺣﻢ ﺧﺰﻳﻨﺔ ﺍﻟﻘﺼﺮ ﻭ ﺗﺒﻌﺚﺗﻘﻮﺻﻠﻲ ﺭﺃﺳﻲ ﻭ ﺯﻳﺪ ﻛﻼﻡ ﺍﻟﻨﺎﺱ ﻳﻘﻮﻟﻮ ﻫﺬﺍ ﻟﻘﻰ 3000 ﻛﻌﺒﺔﻟﻮﻳﺰ .. ﻭ ﻳﺎ ﺳﻴﺪﻱ ﻛﺎﻥ ﺗﺤﺐ ﺍﻟﺠﺮّﺓ ﻣﺘﺎﻉ ﺍﻟﻠﻮﻳﺰ ﻣﺎﺯﺍﻟﺖ ﻣﺨﻔﻴﻬﺎﻓﻲ ﻣﻜﺎﻥ ﻧﻌﺮﻓﻪ ﺍﺫﺍ ﺗﺤﺐ ﺃﺑﻌﺚ ﺷﻜﻮﻥ ﻳﺠﻴﺒﻬﺎ ﺍﻷﻥ ﻭ ﺗﻮ ﺗﻠﻘﺎﻫﻢ30 ﻛﻌﺒﺔ ﻟﻮﻳﺰ ﻻ ﺃﻛﺜﺮ ﻭ ﻻ ﺃﻗﻞ ..ﻗﺎﻝ ﺍﻟﺴﻠﻄﺎﻥ : ﻻ ﻣﺘﺨﺎﻓﺶ ! ﻭ ﻋﻄﺎﻩ ﻛﻴﺲ ﻓﻴﻪ 10 ﺩﻧﺎﻧﻴﺮﻣﻜﺎﻓﺄﺓ ﻷﻧﻪ ﺑﻠّﻐﻪ ﺣﺎﺟﺔ ﻣﺎﻛﺎﻧﺘﺶ ﺗﺠﻲ ﻋﻠﻰ ﺑﺎﻟﻪ ﻭ ﻫﻲ ﺍﻟﻤﺒﺎﻟﻐﺔﻣﺘﺎﻉ ﺍﻟﻨﺎﺱ ﻭ ﻳﻠﻲ ﺗﻘﻮﻟﻮ ﻛﻠﻤﺔ ﻻﺯﻡ ﻛﻴﻒ ﺍﻳﻌﺎﻭﺩﻫﺎ ﻳﺰﻳﺪ ﻋﻠﻴﻬﺎ ..ﻭﻓﺎﺕ ﺍﻟﺤﻜﺎﻳﺔ ﺍﻥ ﺷﺎﻟﻠﻪ ﺗﻜﻮﻥ ﻋﺠﺒﺎﺗﻜﻢ